3. Mai 1393

Nicla der Waͤgist und seine Frau Dyemuet aus St. Georgen bei Rennweg (sand Joͤrgen in dem Chaͤcztal) stiften ihr eigenes Gut in St. Georgen zu ihrem und ihrer Vorfahren Seelenheil an die Kirchen Sankt Peter und Sankt Georgen. Das halbe Gut soll für das Licht in den beiden Kirchen verwendet werden. Auch soll damit ein Jahrtag in der Kirche Sankt Georgen mit einer Vigil und einer gesprochenen und gesungenen Seelenmesse am Tag nach Maria Himmelfahrt begangen werden. Das Gut soll vorrangig an ihre nächsten Angehörigen zu einem üblichen Zins vergeben werden. Siegler: Hanns des Waldekk(er) vnd Ha(n)sen des Smiding(er), Richter zu Chaͤcz. Gegeben 1393 nach Christus an des heyligen Chrewcz Tag als es funden ist.

Quelle: aus Volltext

Ich Nicla der Waͤgist dacz sand Joͤrgen in dem Chaͤcztal mein Hawsfraw Dyemuet vnd all vns(er) erben v(er)iehen offenl(ich) mit dem Prief vnd tuen chunt allen den dye den Prief sehent hoͤrent oder Lesent das wiͤr durch got vnd durch hayl vns(er) sell vnd allen vns(er)n vodern ze helf vnd ze trost vnd mit rat vnd gunst vns(er) nasten frewnt vnd zuͦ der zeit do wir es mit recht wil getuen mochten Recht vnd redl(ich) vnd alle v(er)mug geschaft vnd geben haben vns(er) vreys Aygen ayn guet da wir dy zeit selber auf gesessen sein vnd gelegen ist dacz sand Joͤrgen in dem Dorff mit aller zuͦgehoͤrung nichcz awsgenomen als wiͤr es in nuͤcz vnd in geuer bessesse(n) vnd h(er)pracht haben Also schaff vnd geben wiͤrs den zwain Goczhewsern sand Peter vnd sand Joͤrgen halbs zuͦ dem Liecht Awch schaffen vnd geben wiͤr halbs guͦt dem Pharr(er) zu sand Peter vnd allen seinen nachkoͤmen Also in der beschayden das sy vns alle iar Jaͤrichl(e)n ainen Jaͤrtag begen sullen dacz sand Joͤrgen mit ainer Vigili vnd mit ayner gesprochen mes vnd ayner gesungen Selmes vnd schol der obgenant Pharr(er) vnd sein nachoͤmen vns vnd vnser vodern gedaͤchtnus haben vnd aller gelawbige(n) seln ewichl(ich) des nachsten tags nach vns frawn tag der Auffart Auch schol man das obgenant guet allebeg der nasten frewnt aynne lazzen nach des Pharr(er) vnd der zechmaister rat vmb aynne(n) geboͤnleich(e)n zins den das guet wol getragen mag Es schol auch ain pesleich Pawman der vns(er) guet pawt in des Pharr(er) stift gen durch pessers vricz vnd scherm willen Auch sol der Liechtmaist(er) dacz sand Pett(er) den Prief ynn haben vnd dem Pharr(er) Jaͤrichl(ich) den zins raychen vnd geben von halben guͤt auf den obgenant(en) vns(er) frawn tag damit das der Jartag werd awsgericht vnd ob der Pharr(er) oder sein nachomen daran sawmig waͤren vnd den Jartag also nicht volfierte(n) als an dem Prief geschriben stet so schullen dy Liechtmaist(er) des Pharr(er) tayl yn neme(n) vnd auf payden goczhewss(er) taylen als lang vncz das der Jartag volfiert wirt das dy tayding vnd das geschaͤft also stat vnd vnzebrochen beleiben ebichleichen gib ich obgenant(er) Nicla der Waͤgist vnd mein hawsfraw Dyemuet den obgenante(n) Goczhews(er)n vnd den Pharr(ern) daselbs den brief v(er)sigelte(n) mit der Erbaͤren Hanns des Waldekk(er) vnd Ha(n)sen des Smiding(er) dy zeit Richt(er) ze Chaͤcz anhangunden Insigeln dy irew Insigel an den Prief gehange(n) habent durch vns(er) vleissigen Pet willen in vnd allen irren erben an schaden Dar vnder ich mich obgenannt(er) Nicla mein Hawsfraw Dymuet mit vns(er)n trewn v(er)pinten alles das stat zehal[t]en vnd volfuͤren das an dem Priͤf geschriben stet das ist geschehen so man zalt nach Christi gepurd drewzehn hund(er)t Jaͤr darnach in dem drew vnd Newczkistem Jar an des heyligen Chrewcz Tag als es funden ist

Quelle: aus Digitalisat der Online-Edition

Online-Edition: www.monasterium.net (letzter Zugriff: 26. März 2025)

Eindeutiger Bezeichner: 14/gv

Permanentlink: ark:/74904/u703y0

Siegler Erwähnt

Burgen und Schlösser Kirchen Landstriche Siedlungen